Effekten av arbeidsmarknadstiltak på regional arbeidsløyse : bruk av norske registerdata for perioden 1993-2000

Abstract

Bruk av registerdata kan gi oss nytt innsyn i virkemåten til dei tiltak som vert sett i verk for å få arbeidslause attende i arbeid. Tiltaka i seg sjølv utløyser komplekse prosessar som grip inn i tilværet for dei som av ulike grunnar vert utan arbeid. Registerdata om forløp for den enkelte gir oversikt over utfall av slike prosessar gjennom informasjon om tid som går mellom ulike tilstandar individa gjennomlever, som t.d. frå arbeid til arbeidsløyse, frå arbeidsløyse til tiltak og frå tiltak til arbeid eller attende til arbeidsløyse. Den offisielle arbeidsmarknadsstatistikken fokuserer gjerne på kor mange som er utan arbeid. For det enkelte individ er det likevel kor lang tid ein er utan arbeid som er det sentrale. Rapporten er eit innleiande forsøk på å nytta eksisterande registerdata for analyser av tid i tilstandane ledig, på tiltak eller i arbeid. Det sentrale med analysen er å vurdere kor effektive dei ulike tiltak er m.o.t. til målet om å få folk attende i arbeid. Måla for effektivitet er forskjellar i tid som går før ein kjem attende i arbeid. Vi samanliknar dei individa som har vore på eit eller anna tiltak med andre individ som ikkje har vore på tiltak, men som like sannsynleg kunne ha vore det. Vi måler effektivitet i forhold til den mest sannsynlege kontrafaktiske situasjonen, for å få fram den mest truverdige effekten av tiltaket. Ettersom tida her er berar av inntekt for den enkelte og utgifter for staten kan effektmåla gis ei nokså direkte økonomisk fortolking.